Qatl gaahe imam

حسین والوں سنو یہ ہے قتل گاہِ حسین تڑپ رہا تھا یہیں پر علی کے دل کا چین اِسی مقام پہ زہرا یہ کر رہیں تھیں بین نہ قتل کر میری گودی میں میرا نورِ عین یہاں تلک سنو کیسے حسین آیا تھا لعین کھینچ کے بالوں سے اُسکو لایا تھا

طمانچہ مارکے سینے پہ جب سوار ہوا تڑپ کے رہ گئے شبیر صرف اتنا کہا اُترجا سینے سے ظالم نہ ظلم کر ایسا ہے میرے سینے پہ بس حق میری سکینہ کا یہاں پہ آئی تو مرجائیگی وہ رو رو کر سکینہ دیکھ نہ لے تجھکو میرے سینے پر

کبھی بدن پہ وہ خنجر سے وار کرتا تھا کبھی حسین کے زخموں پہ خاک ڈالتا تھا پھر اپنے پاؤں سے زخموں کو جب مسلتا تھا علی کا بیٹا وہاں بار بار مرتا تھا غریبِ زہرا جب عباس کو پکارتا تھا لعین داڑھی پکڑ کر طمانچہ مارتا تھا

اسی مقام سے ستر قدم تھی دور بہن پکارتی رہی نا کاٹ شمر سوکھا دہن تو جانتا ہے بہت دور ہے ہمارا وطن میں لیکے آؤنگی اسکے لئے کہاں سے کفن وہاں حسن کو ملے دو کفن میں بھولی نہیں یہاں حسین کی قسمت میں اک کفن بھی نہیں

زبان خشک ہے زخمی ہے اسکی پیشانی جوان بیٹے کے قاتل نے ماری ہے برچھی ہزاروں زخم یہ کھاکر گرا ہے تھک کے ابھی ہَوا ہے گرم زمیں تپ رہی ہے مقتل کی پلادے پانی محمد کا یہ نواسہ ہے ہے منہ کھُلا ہوا نا جانے کتنا پیاسہ ہے

اے رونے والوں یہ دل تھام کر سنو منظر چلی چھری تو رکھا ہاتھ ماں نے رو رو کر گلا سمجھ کے وہ کرتا تھا وار گن کے مگر ہاں زخم آتے رہے فاطمہ کے ہاتھوں پر حسین کہتے تھے اماں ہٹالو ہاتھ اماں گلے پہ چلنے دو خنجر بچالو ہاتھ اماں

تڑپتے رہ گئے مقتل میں دونوں ماں بیٹے گلے پہ شاہ کے ظالم نے تیرا وار کئے بیان حال ہو ذیشان اور رضا کیسے ابھی تلک تو بہن اُٹھ رہی تھی گِر گِر کے سرِ حسین کٹا دیکھ نا سکی زینب زمیں پہ ایسے گری جیسے مرگئی زینب