Suno Siffeen Suno

قرآن شجاعت سے میں یاسین سُناؤں دِل والو صفیں باندھو میں صفین سُناؤں

کیا خیمۂ حیدرؑ میں ہے صفین کا منظر جھرمٹ میں ستاروں کی ہے اِک چاند زمیں پر حیدرؑ کے پسر چاروں طرف بیچ میں حیدرؑ یہ دیکھ کے حیران ہے خود مالکِ اشتر آئینہِ نور ایک سبھی عکسِ جلی ہیں مولا کہوں کس کو یہاں سارے ہی علیؑ ہیں

بیٹوں سے مخاطب ہوا عمران کا بیٹا دل مجھ سے یہ کہتا ہے میرا اے بنی زہراؑ یعنی ہے یہ خالق کے ارادے کا ارادہ میداں میں لڑے آج کوئی بیٹا علیؑ کا کھل جائے کہ ولیوں کا ولی لڑتا ہے کیسے میں بھی تو ذرا دیکھوں علیؑ لڑتا ہے کیسے

اِک گوشے سے سُن کر یہ اُٹھا کوئی دِلاور قد تیرہ برس میں ابوطالبؑ کے برابر صورت میں علیؑ حمزہ صفت عزم میں جعفر سرتاپا قدم قدرتِ معبود کا پیکر زہراؑ کی صدا آئی کہ الماس لڑے گا حسنینؑ کے بابا میرا عباسؑ لڑے گا

گویا ہوا پھر دستِ ادب جوڑ کے ضیغم اے محرمِ اسرارِ خُدا خالقِ آدمؑ حسرت ہے ہماری بھی لڑائی یہ لڑیں ہم وعدہ رہا یہ آپ سے اے قبلہِ عالم زہراؑ کی تمنا کا عکاس نہ کہنا دُشمن نہ علیؑ کہہ دیں تو عباسؑ نہ کہنا

سج بن گیا خیمے میں جو حیدرؑ کا دُلارا صدقہ میرے غازیؑ کا وفاؤں نے اُتارا چہرے پہ نقاب آپ یہ کرتا تھا اشارہ تاریخ نے دیکھا کہاں پھر ایسا نظارہ پردے میں کچھ اس طرح سے عباسِ جلی تھے جیسے پسِ پردہ شبِ معراج علیؑ تھے

خیمے سے برآمد ہوا حیدرؑ کا غضنفر غیض و غضب و روب و جلال آئے غضب پر تیار نظر آیا جو لشکر پسِ لشکر جبریلؑ نے دم نادِعلیؑ کر لی پروں پر ہیبت تھی عجب سانس فرشتوں کے چڑھے تھے خود موت سے چھپ کر ملک الموت کھڑے تھے

کس شیر کی آمد ہے کہ رَن کانپ رہا ہے رَن ایک طرف چرخِ کہن کانپ رہا ہے رُستم کا بدن زیرِ کفن کانپ رہا ہے ہر قصرِ سلاطینِ زمن کانپ رہا ہے شمشیر بکف دیکھ کے حیدرؑ کے پِسر کو جبریلؑ لرزتے ہیں سمیٹے ہوئے پَر کو

کس شیر کا میداں میں اُترتا ہے جگر بند اعدا پہ کیا موت نے ہر زیست کا دَر بند منہ کھولیں ہیں حیرت سے زبانیں ہیں مگر بند لشکر ہوا نظروں میں دِلاور کی نظر بند توبہ کا نہ دَر رحمتِ عالم کا کُھلا ہے سب بند ہیں بس رستہِ جہنم کا کُھلا ہے

جس سمت چلا تیغ اُٹھائے وہ بہادر سب طائرِ ارواح اُڑے جسموں سے پُر پُر دہشت سے تھا ہر ایک گُرو بھولے ہوئے گُر تھا تیغ کی جھنکار میں پنجم کا عجب سُر آواز یہی اہلِ دغا دیتے تھے بھاگو سب راگ پہاڑی میں صدا دیتے تھے بھاگو

یکبار کیا شیر نے حملہ جو جھپٹ کر پتوں کی طرح جسم کی شاخوں سے گرے سر سُن سُن جو چلی تیغ اُلٹنے لگے لشکر پیغام علیؑ کا یہ ہوا نے دیا آ کر ارے دِل کھول کے لڑ لو نہ تَرَدُّد میں رہو تم عباسؑ یہیں روک دوں سورج جو کہو تم

تلوار سے ڈر ڈر کے نڈر بھاگ رہے تھے تھی موت اُدھر رَن میں جدھر بھاگ رہے تھے بھاگا نہیں جاتا تھا مگر بھاگ رہے تھے جلدی میں بدن چھوڑ کے سر بھاگ رہے تھے سانس اُن کے رُکے تھے کہ جو میداں میں رُکے تھے زندوں کی یہ حالت تھی کہ مُردوں میں چُھپے تھے

کہتی تھی اَجل دشت سے بے جان سمیٹو یہ ہاتھ یہ سر جسم یہ دندان سمیٹو اے زخمیوں بکھرے ہوئے اوسان سمیٹو گھر جاؤ میری مان لو سامان سمیٹو مرتے ہو جوانی میں عجب ذوق ہے تم کو کیا خودکشی کرنے کا بہت شوق ہے تم کو