Jab ho gaye tamam madadgar haq shaheed

جب ہو گئے تمام مددگار حق شہید شام غریباں چھائی اندھیرا ہوا شدید خیمے جلانے آگئے سب حامی یزید اک بچی چاہتی تھی کہ بابا کی کر لوں دید سہمے ہوئے وہ خیموں سے ڈر کر نکل گئی بابا کو ڈھونڈنے سوئے مقتل وہ چل پڑی

مقتل میں دی صدائیں کہ بابا کہاں ہو تم بابا جلا دیا گیا خیمہ کہاں ہو تم آئی ہے تم سے ملنے سکینہ کہاں ہو تم آواز دو کہ کچھ نہیں دکھتا کہاں ہو تم بیٹی کے بین سن کہ وہ بابا نے کی فغاں بے سر کی لاش نے کہا بیٹی ہوں میں یہاں

بیٹی نے اپنے بابا کی آواز جب سنی لاش پدر کے پاس سکینہ پہنچ گئی روتے ہوئے حسین کے لاشے پہ گر گئی بابا کی زخمی لاش سے بیٹی لپٹ گئی فریاد کی کہ جل گیا کرتا تمہارے بعد مر جائے گی تمہاری سکینہ تمہارے بعد

بابا زمین سرخ ہے اور سرخ آسماں ظالم نے میرے کانوں سے چھینی ہیں بالیاں دیکھوں نہ میرے کانوں سے اب تک ہے خوں رواں اصغر بھی قتل ہو گیا تنہا ہوئی ہے ماں بابا بتاؤ مجھ کو کے میں کیا کروں گی اب اس کمسنی میں تنہا میں کیسے رہوں گی اب

مقتل میں بابا لاشے ہیں بکھرے پڑے ہوئے تیرے مجاہدین نے کتنے ستم سہے سینے پہ تیر بھالے ہیں اور سر کٹے ہوئے کس طرح سارے لاشے ہی پامال ہو گئے لاشوں پہ بابا جان گئی جب میری نظر دل بیٹھنے لگا میرا لگنے لگا ہے ڈر

اکبر کہاں ہے بابا بتاؤ نا تم مجھے لاشہ کہاں ہے اس کا بتاؤ نا تم مجھے پوچھے گی مجھ سے صغری بتاؤ نا تم مجھے کیسے گیا وہ مارا بتاؤ نا تم مجھے ڈھونڈونگی اس کو کیسے میں لاشوں کے درمیاں میں نے سنا ہے سینے میں اس کے لگی سناں

بابا بتاؤ نا میرا بھیا کہاں گیا میرا غریب گھٹنیوں والا کہاں گیا بابا وہ تین روز کا پیاسا کہاں گیا ظالم نے جس کو تیروں سے مارا کہاں گیا وہ مر گیا ہے اس کا تو جھولا بھی جل گیا بابا بتاؤ دفن اسے ہے کہاں کیا

مشکیزہ مجھ سے لے کے گئے تھے مرے چچا مجھ سے کہا تھا دریا سے پانی میں لاؤں گا بابا مجھے بتائیے ایسا بھی کیا ہوا بابا بتائیں کیسے وہ مشکیزہ چھد گیا کس طرح ان کو تیر لگے بازو کٹ گئے کیسے بغیر ہاتھوں کے وہ زین سے گرے

کرب و بلا کا دشت، اندھیرا تھا چار سو بچی لپٹ کے کرتی تھی بابا سے گفتگو بابا کا درد کم ہو یہ تھی اس کی آرزو ہائے ستم کہ آگئے مقتل میں پھر عدو ظالم نے اس یتیمہ پہ ظلم و جفا کیا زلفیں پکڑ کے لاش پدر سے جدا کیا