Riwayat-e-Mukhtar

ہائے اے رونے والو ہے یہ روایات میں لکھا جس دم قیام کوفے میں مختار نے کیا جو بھی تھے قاتلان شہیدان کربلا ارے ان میں سے کوئی جب بھی گرفتار ہوتا تھا حکم امیر پر وہ ستم جب سناتا تھا مختار سر کو پیٹ کے بس روتا جاتا تھا

ہائے اک روز تھا یہ کوفے کے دربار کا سماں ابن نمیر اپنے ستم کرتا تھا بیاں توری تھی میں نے سینہء اکبر میں خود سناں اٹھتا تھا شور خیموں سے مارا گیا جواں ماں جیتے جی گزر گئی زینب بھی مر گئی اک برچھی میری کتنے جگر پار کر گئی

ہائے اک روز کر کے لایا گیا حرملہ اسیر بولا وہ رن میں میں نے چلائے تھے تین تیر اس وقت پہلا تیر چلایا تھا اے امیر بھر کر چلا جو مشک تو مظلوم کا سفیر مشکیزے سے جو تیر میرا پار ہو گیا ایسا لگا کے قتل علمدار ہو گیا

ہائے بولا لعیں یہ قرب کا ہے دوسرا مقام لائے جو اپنی گود میں بے شیر کو امام سوکھی زباں پھیراتا تھا ہونٹوں پہ تشنہ کام یوں قطع ابن زہرا کا میں نے کیا کلام ہل ہل گیا لحد میں جگر بوتراب کا ارے مقتل میں نہر ہو گیا بچہ رباب کا

ہائے دربار میں یہ سن کے قیامت کا تھا سماں ارے پیر و جوان روتے تھے لے لے کے ہچکیاں بولا یہ حرملہ ابھی باقی ہے داستاں جس دم تیرا حسین تھا تیروں کے درمیاں وہ تیر آخری تھا جو میں نے چلایا تھا ارے اس تیر نے حسین کو زیں سے گرایا تھا

ہائے پھر شور واہ حسینا کا اٹھتا تھا بار بار جب قید کر کے لایا گیا شمر بد شیار بولا وہ میرے ہاتھ میں خنجر تھا تیز دھار جسے سے کٹے حسین کی گردن پہ تیرہ وار خنجر رواں تھا حلق پہ ابن بتول کے دل کٹ رہے تھے ساتھ میں آل رسول کے

ہائے اب اس کے بعد میر تکلم بیاں ہو کیا کیوں اتنا وقت قاتل شبیر کو لگا محشر میں یہ کھلے گا ستم کائنات پر

اے پرسہ دارو سوچنا دل میں کبھی ذرا کس واسطے حسین کا کٹتا نہ تھا گلا خنجر کے کچھ نشان ہیں زہرا کے ہاتھ پر