Main Hoon Abbas Ali

میں ہوں عباس علی میں ہوں عباس جری ابوطالب کی وفاؤں کا اثاثہ میں ہوں شیر یزداں کی شجاعت کا خلاصہ میں ہوں

محرم راز رسول دوسرا سے پوچھو گر یہ عقدہ ہے کسی عقدہ کشا سے پوچھو خاص نقطہ ہے اسے نقطہ با سے پوچھو میری خلقت کا سبب شیر خدا سے پوچھو قرۃ عین رسول عربی کی خاطر میں تو زندہ ہوں حسین ابن علی کی خاطر

میں اکیلا ہوں جہاں میں کوئی ثانی نہ نظیر میری ٹھوکر میں زمانہ میں امیروں کا امیر یہ تعارف بھی عیاں کرتا ہے میری توقیر میں ہوں عطائے جہاں اور میرا آقا شبیر ہمت تشنہ لبی جرأت احساس ہوں میں ساری دنیا مجھے پہچان لے عباس ہوں میں

جانے کیا زعم ہے ان موت کے بیماروں کو تشنہ لب رکھا ہے کوثر کے شہنشاہوں کو خوش ہیں ہاتھوں میں سنبھالے ہوئے تلواروں کو ابھی معلوم نہیں شام کے روباہوں کو میں پہاڑوں کی طنابوں کو ہلا سکتا ہوں نہر ٹوٹے ہوئے نیزے سے اٹھا سکتا ہوں

پیاس ہونٹوں پہ جو رکھوں تو تعجب کیا ہے مڑ کے دریا کو نہ دیکھوں تو تعجب کیا ہے آگ پانی میں لگا دوں تو تعجب کیا ہے نہر چلو میں سمیٹوں تو تعجب کیا ہے گفتگو جس پہ سدا ہوگی وہ عنوان ہوں میں کہیں نقطہ کہیں آیت کہیں قرآن ہوں میں

ہے میرے وار کی رفتار ہوا کو معلوم خادمہ تیغ علی ہے میرے جملے مخدوم سبھی جرأت کی صفوں میں ہے ازل سے میری دھوم جسم جب ہونے لگیں گے اپنی جاں سے محروم ہر شجاعت کے دھنی ابن ولی آئے ہیں تم یہ کہتے ہوئے بھاگو گے علی آئے ہیں

کوئی سمجھے تو ذرا مصرع لاسیف کی بات کچھ نہ کچھ مجھ میں بھی موجود ہیں حیدر کی صفات جانتے ہیں وہ جنہیں یاد ہے صفین کی رات ایک حملہ ہی بہت ہوگا پئے قحط حیات شہ رگیں ہوں گی جدا سر کو بدن ترسے گا آج پانی نہیں برسے گا لہو برسے گا

اپنے دل میں ہے جواں فاتح خیبر کی امنگ سنگ کو موم کریں ہم تو کبھی موم کو سنگ زندگی لمحوں میں بے دینوں پہ ہو جائے گی تنگ بھول جاؤ گئے ابھی رستم و سہراب کی جنگ ہم جو تلوار کے قبضے میں کلائی دیں گے ان کے اجداد بھی قبروں سے دہائی دیں گے

میرے سرکار اگر حکم مجھے فرمائیں دوسری سانس بھی اشرار نہ لینے پائیں ایک حملے میں نشانات جہاں مٹ جائیں زلزلے یوں میرے قدموں کی دھمک سے آئیں کانپ اٹھے ساری زمیں تخت امیہ ٹوٹے میں رکھوں رن میں قدم اور در کوفہ ٹوٹے