Main Karb O Bala Hoon

کربلا موت کے سائے کو نگل سکتی ہے کربلا خاک تو کیا آگ پہ چل سکتی ہے خسروی جبر یہاں کاشت نہیں کر سکتی

کربلا تخت کو تلووں سے مسل سکتی ہے کربلا وقت کی رفتار بدل سکتی ہے کربلا تاج کو برداشت نہیں کر سکتی

کب بھلا سب کو میسر ہے مصلی میرا نام شبیر نے رکھا ہے معلی میرا

طور پر موسی نے بس ایک جھلک دیکھی تھی ہے مجسم یہاں موجود حسین ابن علی میری مٹی کو بھلا طور سے نسبت کیسی باتیں کرنے وہاں اللہ سے جاتے تھے نبی میری سرحد میں یہ قانون بدل جاتا ہے یہاں شبیر سے ملنے کو خدا آتا ہے

میں نے عباس کے قدموں سے وفائیں لے لیں اپنے قبضے میں زمانے کی ہوائیں لے لیں رحمتوں نے میری بھر بھر کے بلائیں لے لیں میری مٹی نے جو زہرا کی دعائیں لے لیں رات دن معجزے اس واسطے ہوتے ہیں یہاں شب عاشور کے جاگے ہوئے سوتے ہیں یہاں

میری معراج کی تاریخ ہے اکسٹھ ہجری وہ جو صدیوں سے تھی بے چینی میری ختم ہوئی میری تقدیر نے حر کی طرح کروٹ بدلی میں نے مانگی تھی جو دولت مجھے شبیر نے دی اب میری خاک کسی تاج کی محتاج نہیں شہ کی نعلین سے بڑھ کر تو کوئی تاج نہیں

ابن زہرا نے تکلم میرے بدلے حالات ہے میری راہ سے لپٹی ہوئی اب راہ نجات تخت بلقیس بنی ہے میرے ذروں کی زکوۃ ایک پیاسے نے پلایا ہے مجھے آب حیات میری وادی پہ قیامت نہ گرائے گا خدا جیسی ہوں حشر میں ویسا ہی اٹھائے گا خدا