Sakhi Abbas Ke Hath

مختصر ہے جو وہی بات نہ پھیلا دینا نا امیدی کے خیالات نہ پھیلا دینا اپنی تقدیر کی تم رات نہ پھیلا دینا غیر کے در پہ کبھی ہاتھ نہ پھیلا دینا پنجہ موجود علم پر ہے اشارے کے لیے ہاتھ غازی نے بڑھایا ہے سہارے کے لیے

خواہش زینب دلگیر ہیں دست عباس ہاں یداللہ کی شمشیر ہیں دست عباس نور خالق ہی کی تنویر ہیں دست عباس خلق کے کاتب تقدیر ہیں دست عباس جسم غازی سے قلم ہو کے قلمکار بنے کشتی دیں کے چلانے کو یہ پتوار بنے

غور سے دیکھو تو مصروف دعا ہے پنجہ درد و غم کے لیے مرہم ہے دوا ہے پنجہ ہر گھڑی خلق پہ مائل با عطا ہے پنجہ کیا بتائیں تمہیں ہم لوگ کہ کیا ہے پنجہ مہرباں ہم پہ ہے یہ نور کا سانچہ بن کر اور یزیدوں کو یہ لگتا ہے طمانچہ بن کر

یہ بھی اک تحفہ ہے شیعوں کی عقیدت کے لیے بات جب ہوگی وہاں بخشش امت کے لیے حشر میں آئیں گی تب زہرا شفاعت کے لیے اک صدا گونجے گی اٹھ جاؤ اطاعت کے لیے دست عباس ہوئے تھے جو قلم لائی ہیں فاطمہ حشر میں دو اصلی علم لائی ہیں

مدح مولا میں جو ماہر ہوں میں ظل ثقلین اپنی تقدیر پہ شاکر ہوں میں ظل ثقلین کربلا والوں کا شاعر ہوں میں ظل ثقلین سخی عباس کا ذاکر ہوں میں ظل ثقلین مجھ سے مت پوچھو کہ مجھ پر یہ کرم کس کا ہے غور سے دیکھو میرے سر پہ علم کس کا ہے