Main Hoon Rahwar-e-Hussain

وہ جو ہے شافع بطحا وہ ہے آقا میرا جس کی ٹھوکر میں ہے دنیا وہ ہے آقا میرا جس کے سجدے میں ہے کعبہ وہ ہے آقا میرا جو ہے عباس کا آقا وہ ہے آقا میرا نور کو جس نے اٹھایا وہ عماری میں ہوں دوش احمد کے سواروں کی سواری میں ہوں

ذوالجناح نام ہے شبیر کا رہوار ہوں میں نور اول کی قسم شامل انوار ہوں میں خود وفادار یہ کہتے ہیں وفادار ہوں میں میرے ہم جنس جو ہیں انکا علمدار ہوں میں جب سے اللہ نے اس در کی غلامی دی ہے مجھ کو آ آ کے فرشتوں نے سلامی دی ہے

نسبت خاص یہ رکھی ہے طہارت مجھ سے دور اللہ نے رکھی ہے نجاست مجھ سے باتیں کرتی رہی اللہ کی آیت مجھ سے کتنا خوش بخت ہوں میں خوش ہے امامت مجھ سے رب کعبہ کی قسم یوں بھی عبادت کی ہے میں نے اللہ کے چہرے کی زیارت کی ہے

در عمران نے بخشا ہے یہ فیضان مجھے روز اول سے ہے توحید پہ ایمان مجھے حد ممکن میں نہیں لا سکا امکان مجھے جانور ہے وہ سمجھتا ہے جو حیوان مجھے آیتوں میں بخدا ذکر مرا آیا ہے میری ٹاپوں کی تو اللہ قسم کھاتا ہے

امر خالق سے میں انوار کے پیکر میں ڈھلا شب اسرا میری رفتار سے براق چلا کب سمجھ پایا زمانہ میرے رتبے کو بھلا جہاں حسنین پلے میں بھی اسی گھر میں پلا دانہ شہزادی نے پلو میں کھلایا ہے مجھے پانی سقائے سکینہ نے پلایا ہے مجھے

ہے عزادار زمانے میں دعائے زہرا ہے عزادار کے ہمراہ ولائے زہرا ہے عزادار پہ ہر گام عطائے زہرا سایہ کرتی ہے سدا اس پہ ردائے زہرا ہر عزاداری شبیر کا معمار ہوں میں برسر لاشہ شہ پہلا عزادار ہوں میں