Nabi ki god ka pala khuda shiaar Hussain

نبی کی گود کا پالا خدا شعار حسین عبادتوں کا بھرم دین کا وقار حسین ہے باب علم کا انمول شاہکار حسین تحفظات شریعت کا ذمہ دار حسین تصرفات ملے ہیں نبی سے گھٹی میں تمام عالم امکاں ہیں اس کی مٹھی میں

سنے یہ سارا جہاں ابن ابو تراب ہے یہ کتاب عظمت اسلام کا نصاب ہے یہ جواب کوئی نہیں اس کا لاجواب ہے یہ غروب ہوتا نہیں ایسا آفتاب ہے یہ یہ خاندان محمد کا شہزادہ ہے نبی کو پالنے والا اسی کا دادا ہے

یہ معجزہ ہے تو بس معجزہ دکھاتا ہے بلا کی تیز ہوا میں دیا جلاتا ہے زمیں کو عرش کی دہلیز سے ملاتا ہے یہ چاہتا ہے تو اک شب میں حر بناتا ہے ملا ہے ساری خدائی پہ اقتدار اسے خدا نے دے دیئے سب اپنے اختیار اسے

کرم نواز نظر کاتب نصیب حسین ادب سلام کرے جس کو وہ ادیب حسین سناں کی نوک پہ اللہ کا خطیب حسین یزیدیت کے ہر اک مرض کا طبیب حسین خدا مثال ہے جب چاہے کیا سے کیا کر دے حسین موت کو بھی زندگی عطا کر دے

غم حسین کے دشمن اے منکر سرور اے فتوے باز منافق یزیدوانیء شر الٹ دے بغض کے پردے کو رخ سے تنگ نظر ہمارے کالے لباسوں پے اعتراض نہ کر سیاہ پوشی اگر کفر کا حوالہ ہے خدا کے گھر کا بتا کیوں غلاف کالا ہے

دیار علم مثال نجف حسین کا در علی کے لال کا زہرا کے نور عین کا در حسن کے بھائی کا مولائے صادقین کا در ہے بے مثال جہاں شاہ مشرقین کا در در حسین سے یاسر جو بھیک لیتا ہے وہ اہل علم کو خیرات علم دیتا ہے