Hai Arbaeen Shah e Shaheedan e Karbala

ہے اربعین شاہ شہیدان کربلا پہنچے ہیں تربتوں پہ اسیران کربلا ماتم سے کانپتا ہے بیابان کربلا زینب پکاری گور غریبان کربلا لاشے پہ کر نہ پائی تھی ماتم حسین کا آئی ہوں کرنے شام سے چہلم حسین کا

بھیا سلام زینب دلگیر کا سلام اجڑی ہوئی بتول کی تصویر کا سلام آئی ہے چھٹ کے قید سے ہمشیر کا سلام شانوں پہ ہے جو ظلم کی تحریر کا سلام اک سال قید کاٹے ہوؤں کا سلام ہے اب تک ہماری آنکھوں میں زندان شام ہے

کس طرح سال ہم نے گزارا ہے کیا کہیں رہ رہ کے ہم کو لوگوں نے مارا ہے کیا کہیں زخمی بدن تمام ہمارا ہے کیا کہیں پر دل پہ زخم اب بھی تمہارا ہے کیا کہیں زندان میں یہ غم تھا کوئی غم نہ کر سکے ہم سال بھر شہیدوں کا ماتم نہ کر سکے

دریا پہ جب سے سو گیا عباس باوفا سب مان ٹوٹے ہم نے اٹھائی ہر اک جفا یہ داغ دل پہ اور قیامت گرا گیا عباس ہے کہاں پہ یہ کہتے تھے اشقیاء غازی کو جب سکینہ بلاتی تھی بار بار رخسار پر طمانچے وہ کھاتی تھی بار بار

ہر ظلم سے نہ اس کو میں بھیا بچا سکی پیاسی رہی بھی، پیاس نہ اس کی بجھا سکی سونپی تھی آپ نے جو امانت نہ لا سکی افسوس نہ سکینہ رہا ہو کے آ سکی کیا کیا بتاؤں کتنے غموں کی ستائی ہوں زنداں میں اس کی قبر بنا کر میں آئی ہوں

سہہ روز کربلا میں ہوئی مجلس عزا صحرا میں شور و شین کی ماتم کی تھی صدا قبروں پہ اپنے پیاروں کی ماتم جو کر لیا عابد نے آ کے زینب مضطر سے یہ کہا اٹھیے پھوپھی کہ اشک وہاں بھی بہائیں گے پیاسوں کو روتے روتے مدینے میں جائیں گے

کیونکر غریب جائے گی پردیس سے وطن مٹی میں مل گئے سبھی زہرا کے گلبدن اس داغ کربلائی سے ہے زندگی کٹھن اے کاش کہ یہاں پہ ہی مر جائے یہ بہن جا کر وطن میں حال سناؤں گی کس طرح صغری سے اپنے زخم چھپاؤں گی کس طرح

ہے اربعین اے میرے شبیر مرحبا پہنچی ہے قبر پر تری ہمشیر مرحبا ہوگی یہاں پہ روضوں کی تعمیر مرحبا اٹھ کر کہو کے زینب دلگیر مرحبا مشہور کر کے تیری شہادت کو آئی ہوں بابا کی میں بچا کے ولایت کو آئی ہوں

ماتم کرو کہ فصل عزا اختتام ہے شہہ کی عزا نہیں ہے تو جینا حرام ہے ہم ہیں حسن انیس غم ناتمام ہے سانسیں رواں ہیں آرزوئے انتقام ہے کیسے دلوں کے چین کو ہم الوداع کہیں کیسے غم حسین کو ہم الوداع کہیں