Karbala Aam Karein

اے میرے دیس کے لوگو میری آواز سنو میری آواز میں مقتل کا یہ آغاز سنو کیا خبر تم نہ رہو کیا خبر ہم نہ رہیں آؤ اک کام کریں کربلا عام کریں

جس طرح ثانیء زہرا نے اسے عام کیا ایک زنجیر کی جھنکار نے وہ کام کیا جس طرح سے شہدا نے سفر شام کیا یعنی نیزوں سے بلند اور بھی اسلام کیا ہم اسی طرز قیادت کی ادا عام کریں

یہ جو مجلس ہے مداوا ہے ہر اک غم کے لیے اک سوغات ہے یہ دیدہء پرنم کے لیے سوز دل چاہیے تہذیب محرم کے لیے کوئی تفریق نہیں حلقہء ماتم کے لیے رونے والوں کے لیے فرش عزا عام کریں

آؤ دیکھو کے یہ خیمہ یہ علم کس کا ہے خون سے نام یہ صحرا پہ رقم کس کا ہے ابھی تاریخ سے آگے یہ قدم کس کا ہے ساری دنیا کو بتا دیں کے یہ غم کس کا ہے ساری دنیا کے لیے غم کی فضا عام کریں

تم بھی سینے میں یہ غم لے کے چلو ہم بھی چلیں تم بھی انکار ستم لے کے چلو ہم بھی چلیں تم بھی حق کا یہ حشم لے کے چلو ہم بھی چلیں تم بھی غازی کا علم لے کے چلو ہم بھی چلیں ہر زمانے کے لیے ذکر وفا عام کریں

ایسا اعجاز تو تاریخ نے دیکھا نہ سنا جو دیا نور کے ہاتھوں شب عاشور بجھا سب شہیدوں کے دلوں میں وہ دیا جا کے جلا آج بھی روشنی دیتا ہے وہی ایک دیا ہر اندھیرے میں وہی ایک دیا عام کریں

پاس شبیر کے اپنے بھی ہیں اغیار بھی ہیں خاندان بنی ہاشم بھی ہے انصار بھی ہیں حر بھی ہیں جون بھی ہیں اکبر جرار بھی ہیں جان دینے کے لیے صبح سے تیار بھی ہیں ایسے مقتل کی فضا کو باخدا عام کریں

قافلہ رہ گیا اک دشت بلا میں پیاسہ جن کی میراث تھی کوثر انہیں پانی نہ ملا یہ سبیلیں ان ہی پیاسوں سے وفا ہیں باخدا کوئی پیاسہ نہ رہے تھی یہ سکینہ کی دعا ہر زمیں پر یہ سکینہ کی دعا عام کریں

رہنما قتل ہوا قتل قیادت نہ ہوئی اک امام اور بڑھا ختم امامت نہ ہوئی جسم روندھے گئے پامال شریعت نہ ہوئی چادریں چھن گئیں باطل کی حکومت نہ ہوئی یہ محمد کے گھرانے کی وفا عام کریں

میرے مولا میرے آقا یہ تیرا غم نہ رکے کتنے طوفاں بھی ہلال آئے مگر ہم نہ رکے اے عزادار یہ مجلس یہ محرم نہ رکے وقت کتنا ہی بدل جائے یہ ماتم نہ رکے یہ شہیدوں کا ہے ماتم باخدا عام کریں