Hum Honge Kahin

شہ کہتے تھے بی بی ہمیں اب جانے دو گھر سے وہ کہتی تھی سایہ جو یہ اٹھ جائے گا سر سے ہائے ہائے میں تمہیں ڈھونڈ کے لاؤں گی کدھر سے شہ کہتے تھے مقتل ہی میں پاؤ گی سکینہ ہم ہوں گے کہیں تم کہیں جاؤ گی سکینہ ڈھونڈو گی تو پھر ہم کو نہ پاؤ گی سکینہ

جنگل میں بہت قافلے لٹ جاتے ہیں بی بی برسوں جو رہے ساتھ وہ چھٹ جاتے ہیں بی بی حسرت سے یہ دم سینوں میں گھٹ جاتے ہیں بی بی چھٹ جاؤ گی بابا کو نہ پاؤ گی سکینہ

جب عمر تھی کم ہم بھی چھٹے تھے یونہی ماں سے سوتے تھے لپٹ کر یونہی خاتون جناں سے کوچ ان کا ہوا سامنے آنکھوں کے جہاں سے صدمے یہی اب تم بھی اٹھاؤ گی سکینہ

یوں کہنے لگی سینے پہ منہ رکھ کے وہ ناداں کہتے ہیں یتیمی کسے میں آپ پہ قرباں حضرت نے کہا سخت مصیبت ہے میری جاں چین ایسی اذیت میں نہ پاؤ گی سکینہ

دن ہجر کے آپہنچے گئے وصل کے ایام لکھا تھا بہت کم تیری تقدیر میں آرام دکھلائے گی یہ صبح یتیمی کی تمہیں شام کس طرح سے یہ داغ اٹھاؤ گی سکینہ

خاموش انیس اب کہ جگر چاک ہے غم سے بہتا ہے لہو اشک کی جاں دیدہ نم سے دوری یہ زیارت سہی جاتی نہیں ہم سے کیا روضے پہ اپنے نہ بلاؤ گی سکینہ

اب آیا سمجھ میں یہ سخن ہونٹوں پہ لانا کیوں کہتے تھے زینب اسے چھاتی پہ سلانا ارے بانو میرے پیچھے نہ سکینہ کو رلانا دل کہتا تھا بابا کو نہ پاؤ گی سکینہ