Khandaq Na Khayen Aap Main Khandaq Sunaonga

یا قاہر العدو یا والی الولی یا مظہر العجائب یا مرتضی علی حیدر کی ذوالفقار کے جوہر دکھاؤں گا خندق نہ کھائیں آپ میں خندق سناؤں گا

خندق میں دیکھنے کو مسلمان تھے بہت ظاہر میں سب رسول پہ قربان تھے بہت ویسے تو وہ نبی کے نگہبان تھے بہت بس ابن عبد ود سے پریشان تھے بہت ہنستے تھے ان کو دیکھ کے کفار موج میں کچھ تھے احد کے بھاگنے والے بھی فوج میں

لشکر میں ایسے مرد بھی آئے تھے بے مثال آتا تھا صرف خیمے کے اندر انہیں جلال کرتے تھے یاد دل میں وہ جنگ احد کا حال بھاگے تھے ایسے سانسیں ابھی تک نہ تھیں بحال اس بار تو عجیب ہے آفت پڑی ہوئی پیچھے ہے کھائی آگے ہے خندق کھدی ہوئی

کہتے تھے دل ہی دل میں وہ سلمان کو برا اس نے ہمارے ساتھ یہ اچھا نہیں کیا کیوں مشورہ رسول کو خندق کا دے دیا عجمی نے انتقام یہ عربوں سے لے لیا سرکار نے سنی نہیں آخر کسی کی بات پھر آج باتوں باتوں میں رکھ لی اسی کی بات

گزرے ہیں چار سال ہی اس بات کو ابھی لائے تھے پہلی بار اسے بزم میں علی اب جتنا یہ قریب ہے اتنا نہیں کوئی اور آج تو حدیث بھی ارشاد ہو گئی واقف ازل سے ہے یہ ہمارے مزاج سے سلمان اہلبیت میں شامل ہے آج سے

کہتے تھے بیس روز سے یہ تیس مار خاں کچھ ہیں پرانے دوست بھی آئے ہوئے یہاں آپس میں اچھی بات نہیں ہیں لڑائیاں کچھ تو کریں خیال ہمارا شہ زماں ایسا نہ ہو کہ رشتہ پرانا یہ ٹوٹ جائے اے کاش صلح کر لیں نبی جان چھوٹ جائے

اک روز عمرو نے یہ دکھائی بہادری خندق کو پار کر کے ادھر آگیا شقی خیموں کے پاس آ کے یہ آواز اس نے دی اتنے ہو ایک مرد بھی تم میں نہیں کوئی بیٹھے ہوئے ہیں خیموں میں منہ کو چھپائے ہیں کیا عورتوں کو ساتھ نبی لے کے لائے ہیں

پھر ایک بار بولا ستمگر دھاڑ کر ایمان ہے تمہارا سنا ہے جہاد پر مارو یا مارے جاؤ گے میدان میں اگر جنت میں تم کو ملنا ہے اپنے خدا سے گھر لو میں کھڑا ہوں اپنا مقدر سنوار لو مر جاؤ میرے ہاتھ سے یا مجھ کو مار لو

اللہ رے اس کا خوف تھے خاموش سب کے سب دانتوں تلے زبان تھی اور سل گئے تھے لب دن میں اندھیرا چھا گیا آنکھوں میں مثل شب ناگاہ آگے آیا وہ گستاخ بے ادب منہ تک رہی تھی موت بھی اس بے اصول کا نیزے سے چاک کر دیا خیمہ رسول کا

گستاخ نے یہ بے ادبانہ کیا جو وار کچھ اور ڈر کے ہٹ گئے اصحاب جانثار اٹھ اٹھ کے دیکھنے لگی پہلو سے ذوالفقار ایسا ہوا تھا دور پیمبر میں پہلی بار تھا ابن عبد ود کا ستارا زوال میں رحمت کو کائنات نے دیکھا جلال میں