Aye Khuda Aisa Pisar De Jo Mera Sani Ho

اے خدا ایسا پسر دے جو مرا ثانی ہو نام عباس ہو وہ شیر نیستانی ہو ہاتھ اس کا بھی ید قوت یزدانی ہو اس کا حملہ بھی مری طرح سے طوفانی ہو ہو بہو میری طرح قافلہ سالار بنے میں علمدار ہوں تو وہ بھی علمدار بنے

میری گفتار سی گفتار کا حامل ٹھہرے وہ مرے جیسے ہی کردار کا حامل ٹھہرے ہاں مرے نور کا انوار کا حامل ٹھہرے یعنی وہ میرے ہی معیار کا حامل ٹھہرے روپ میرا ہو شجاعت بھی مرے جیسی ہو میرے اس شیر کی طاقت بھی مرے جیسی ہو

علم ہو ایسا کہ وہ علم کا دریا ہووے شان ہو ایسی کہ عقلوں سے جو بالا ہووے رعب و ہیبت میں وہ بالکل مرے جیسا ہووے اور وفا ایسی کہ کونین میں چرچہ ہووے عاشق ناطق قرآن ہو بیٹا میرا تیری حجت کا نگہبان ہو بیٹا میرا

وہ جیئے تو جیئے زہرا کے پسر کی خاطر آرزوئے دل سرور کے ثمر کی خاطر تیرے محبوب کی آنکھوں کی نظر کی خاطر یعنی شبیر سے معراج بشر کی خاطر خاطر ابن نبی زیست کا ساماں دے دے حکم زہرا کا پسر دے دے تو وہ جاں دے دے

یہ دعا پوری ہوئی حق سے دلاور پایا اپنے معیار پہ حیدر نے برابر پایا اپنے کردار سے کردار کا پیکر پایا یعنی خود حیدر کرار نے حیدر پایا جو دعا مانگی تھی حیدر نے اسی جیسا تھا ہو بہو سر تا پا عباس، علی جیسا تھا

جب لیا گود میں حیدر نے کہا بسم اللہ میرے ارمان جگر میری دعا بسم اللہ میرے خورشید و قمر میری ضیاء بسم اللہ اے مرے لخت جگر میری ادا بسم اللہ خوب جچتا تھا در علم کو گل یاسم کا چاند کی گود میں تھا چاند بنی ہاشم کا