Bahr e Khushnoodi e Zahra Ho Sana e Abbas

بحر خشنودی زہرا ہو ثنائے عباس سرو طوبی سے بھی اعلی ہے لیوائے عباس بس علم خلق ہوا ہے تو برائے عباس کون سرتاج وفا کا ہے سوائے عباس جب تک اس شیر کا اک نقش قدم باقی ہے یوں سمجھئے کے وفاؤں کا بھرم باقی ہے

نزد گہوارائے عباس جو شبیر گئے دیکھ کر چہرہ مولود ثنا کرنے لگے اور جبیں دیکھ کے عباس کی پھر یوں بولے کہہ دو یہ جا کے عبادت سے کے وہ آہ بھرے اتباع اور اطاعت کا نظام آیا ہے مذہب ضبط و شجاعت کا امام آیا ہے

دیکھا حیدر نے جو شبیر کا عباس سے پیار مسکرا کر کہا بیٹے سے پدر تم پہ نثار چھوٹے بھائی کا کوئی نام بھی رکھا زینھار کی حسین ابن علی نے یہ علی سے گفتار عوض توحید کا عکاس کہیں گے ان کو بابا ہم آج سے عباس کہیں گے ان کو

کوئی عباس کے کردار کی کیا دے گا مثال ان کی آنکھوں میں ہے قرآن محبت کا جمال ہے خیال ان کا وہی جو ہے امامت کا خیال ان کے کردار کی رفعت میں نہیں کوئی سوال ایسی رفعت کے جہاں سرحد عصمت مل جائے دو قدم آگے بڑھیں اور امامت مل جائے

یہ مودت کے گلستان کی بے مثل بہار وہ چچا ہے جو بھتیجی کی اداؤں پہ نثار آس بچوں کی بھی اور اہل حرم کا ہیں حصار آج بھی فوج حسینی کے ہیں پرچم بردار یہ علم چوم کے جنت کی ہوا پاؤ گے اس میں تم دور سے خوشبوئے وفا پاؤ گے

سوچ کر ہاتھ لگانا یہ ہے غازی کا علم قلب کو پاک بنانا یہ ہے غازی کا علم ذہن کا رجس ہٹانا یہ ہے غازی کا علم تب کہیں اس کو اٹھانا یہ ہے غازی کا علم ورنہ کفار سے جب جنگ میں ٹکراؤ گے تم بھی میداں میں علم پھینک کے بھاگ آؤ گے