Yeh Azadar Ke Aansoo

کیا بتاؤں میں زمانے کو فضیلت ان کی چند قطرے ہیں مگر خوب ہے عزت ان کی بحر عالم سے کہیں زیادہ ہے وسعت ان کی مجلس شاہ میں بہنا ہے عبادت ان کی چشم پر درد کی توقیر بڑھا دیتے ہیں رونق مجلس شبیر بڑھا دیتے ہیں

آج کہتا ہے زمانہ جو انہیں اشک عزا یہ لقب مجلس سرور کے سبب ان کو ملا ساری دنیا میں کوئی مثل نہیں ہے ان کا نہ کسی اور نے پایا کبھی ایسا رتبہ پرسہ داری کی روایت کا عنوان بنے ہاں عزاداری شبیر کی پہچان بنے

ہے عزادار کی آنکھوں سے تعلق ان کا منتظر رہتے ہیں ہر وقت برائے پرسہ قدرتا پایا ہے ان سب نے سلیقہ ایسا نام شبیر سنا آنکھ سے اخراج کیا ضیغم ساقی کوثر کہ پرستار ہیں یہ ان کو نسبت ہے وفاؤں سے وفادار ہیں یہ

ان گنت وصف ہیں ان کے غم سرور کی قسم ان کو اللہ نے بخشا ہے عجب جاہ و حشم حضرت جعفر صادق سے روایت ہے رقم جو غم شہ میں بہائے گا وہ جائے گا ارم اپنی تقدیس کا اعجاز دکھا سکتے ہیں آگ اک پل میں جہنم کی بجھا سکتے ہیں

یہ وہ آنسو ہیں جو ہر ایک کی قسمت میں نہیں صاحب دولت و قوت کی اطاعت میں نہیں یہ نگینے کسی تاجر کی تجارت میں نہیں جز عزادار کسی اور کی بیعت میں نہیں آج بھی حر کی طرح برسر پیکار ہیں یہ مجلس شاہ سے منسوب ہیں مختار ہیں یہ

جب بھی ہوتا ہے سر مجلس سرور گریہ اشک آنکھوں سے بہاتے ہیں سبھی اہل عزا چن کے لے جاتی ہیں رومال میں اپنے زہرا اور یاسر یہی کہتیں ہیں بصد آہ و بکا یہ وہ آنسو ہیں نہیں ہے کوئی جن کا ہمسر زخم شبیر پہ لگتے ہیں یہ مرہم بن کر