Qasim Ibn Hasan Hoon

جو ہے وقار مطلبی خاندان کا تم کو سنا رہا ہوں رجز اس جوان کا

آیا ہے شیر رن میں غذا لو رکو رکو جاتے کہاں ہو برچھیوں والو رکو رکو بیعت کے عنکبوت کے جالو رکو رکو پہلے جمل کی گود کے پالو رکو رکو کھانی ہے جنگ تم نے شہہ مشرقین سے ہم سے بچو گئے جب تو لڑو گے حسین سے

یہ کہہ کے شیر نر نے چڑھائی جو آستیں الٹی میان دشت صفوں پر صفیں لعیں راہی سقر کے ہونے لگے دشمنان دیں حملے میں وہ دھمک تھی کہ ہلنے لگی زمیں رن کی زمین چیخ کے بولی دہائی ہے یا رب ابوتراب کی کس سے لڑائی ہے

عباس نامدار سے حرف دعا لیا لشکر سمیت شیر نے رن کو اٹھا لیا ہیبت سے کوہساروں نے سر کو جھکا لیا رستم نے اپنے منہ کو کفن میں چھپا لیا مولا علی کا رنگ وغا یاد آگیا میداں میں کافروں کو خدا یاد آگیا

آئی صدا نجف سے میرا نام دم کرو میری ہی طرح حرف شجاعت رقم کرو دادا کی جان تیغ کی رفتار کم کرو میدان تم نے جیت لیا ہے نہ غم کرو حسرت کے اشک بن کے سب ارمان بہہ نہ جائے اس امتحان میں ملک الموت رہ نہ جائے

فوجوں میں غل ہوا کہ گئی زندگی کی ناؤ پنجے سے ہم کو شیر نیستان کے چھڑاؤ عزی ہبل منات کہاں مر گئے بتاؤ تینوں کو دے رہے تھے صدا آؤ آؤ آؤ ہم منتشر صفوں کی جو تنظیم کرتے ہیں قاسم ہمارے جسموں کو تقسیم کرتے ہیں

نعرہ تھا دشت میں عمر بدخصال کا لو شامیوں پہ آگیا لمحہ زوال کا یہ بازوؤں کا زور یہ حملہ کمال کا لگتا ہے یہ جوان ہے بتیس سال کا عباس نامور کو شہہ مشرقین نے دے دی رضا جہاد کی شاید حسین نے

یوں مثل ذوالفقار چلی تیغ بے اماں گرنے لگے زمین پہ چوٹی کے پہلواں ہیبت وہ تھی کہ جس سے لرزتے تھے آسماں اک حرف بزدلی کا سفر تھا زباں زباں بھاگو خدا کے شیر کے عکاس آئے ہیں قاسم نہیں یہ حضرت عباس آئے ہیں

وہ پیکر نفاق وہ ارزق وہ فیل مست اپنی اجل کا کرتے ہوئے خود ہی بندوبست بیٹوں کے داغ اٹھا کے جو آیا لگا کے جست آئی صدا نجف سے میرے لال دو شکست ہر حال میں لعین کی گردن مروڑنا یہ منکر غدیر ہے اس کو نہ چھوڑنا