Sar jo Shabbir ka zindan mein laye khuddam

سر جو شبیر کا زندان میں لائے خدام بھائی کے سر کو کیا زینب مضطر نے سلام تھا گرفتار سلاسل جو زمانے کا امام اٹھا تعظیم کو لے کر شہ مظلوم کا نام طشت حلقے میں لئے کشتہء غم رونے لگے سر شبیر کو دیکھا تو حرم رونے لگے

حال کہنے کا یہ لمحہ جو سکینہ کو ملا سر شبیر کو سینے سے لگا کر یہ کہا چھوڑ کر ہم کو گئے آپ کہاں اے بابا آپ کے بعد ستم ٹوٹے ہیں ہم پر کیا کیا میرے رخسار پہ جو نیل عیاں ہے بابا یہ میرے منہ پہ طمانچوں کے نشاں ہے بابا

سب نے ماتم کیا مل کر ہوئی مجلس برپا چوم کر سر کو عقیدت سے یہ زینب نے کہا دکھ اٹھائے ہیں بہت تم سے بچھڑ کر بھیا اپنی آغوش میں سر بالی سکینہ نے لیا رو رہے تھے سبھی رکتے ہی کہاں تھے آنسو سر شبیر کی آنکھوں سے رواں تھے آنسو

روتے روتے ہوئی خاموش سکینہ اک بار کہا زینب نے یہ میں تیری مصیبت کے نثار آ میری گود میں آجا میری پیاری دلدار پر سکینہ نہ ہلی اپنی جگہ سے زینب جا ملی باپ سے وہ باپ کی پیاری بچی چل بسی شام کے زندان میں دلاری بچی

آپ میداں کو سدھارے تو بڑا ظلم ہوا آگ خیموں میں لگی جل گیا ساماں سارا چھن گئے میرے گوہر جل گیا میرا کرتا روتی پھرتی تھی میں اس دشت بلا میں تنہا نہ دیا ہم کو کسی نے بھی سہارا بابا پوچھتا کوئی نہ تھا حال ہمارا بابا

قید سے ہو کے رہا جب یہ مدینے پہنچے ماں کے کانوں میں سکینہ کے سخن گونجتے تھے جو ستم بچی پر ٹوٹے وہ بھلائے نہ گئے روتی پھرتی تھی وہ مظلوم یہی کہہ کہہ کے ہو کے جب شام کے زندان سے ہوا آتی ہے اے سکینہ تیرے رونے کی صدا آتی ہے

کانپتے ہاتھوں سے عابد نے بنائی تربت دفن کی اس میں حسین ابن علی کی دولت نہ سنی اور نہ دیکھی کہیں ایسی غربت دل بھر آیا تو ہوئی حد سے زیادہ رقت بچی کے حال پر سب کشتہء غم روتے تھے قبر حلقے میں لئے اہل حرم روتے تھے