Umm-e-Kulsoom

آیت رب کا اک عنوان ہیں ام کلثوم دل زہرا کا ہی ارمان ہیں ام کلثوم کربلا ہی کی نگہبان ہیں ام کلثوم سر بہ سر سورہ رحمن ہیں ام کلثوم اوج پر صاحب مسند ہی نظر آئی ہیں یہ تو زینب کو بھی زینب ہی نظر آئی ہیں

مثل زینب ہیں ولایت کا اثاثہ یہ بھی برسر شام سناتی گئیں خطبہ یہ بھی مثل زینب ہی علی کا ہیں سراپا یہ بھی چھوٹی زینب ہیں سو ہیں ثانی زہرا یہ بھی آیت زینب کبری کے معانی کلثوم جس کا ثانی ہی نہیں اس کی ہے ثانی کلثوم

پیکر سیدہ زہرا میں ڈھلی ہیں کلثوم گود میں ام ابیہا کے پلی ہیں کلثوم باغ توحید و رسالت کی کلی ہیں کلثوم رب حیدر کی قسم رب کی ولی ہیں کلثوم وار باطل کا خود اس پر ہی پلٹ سکتی ہے یہ بھی زینب کی طرح شام الٹ سکتی ہے

کاتب لوح کی تحریر ہیں ام کلثوم ثانی زینب دلگیر ہیں ام کلثوم کربلا خواب ہے تعبیر ہیں ام کلثوم یعنی عباس کی ہمشیر ہیں ام کلثوم ایک ہی لہجے میں سب رب کے ولی بولتے ہیں یہ بھی جب بولیں تو لگتا ہے علی بولتے ہیں

سیدہ زہرا کا اظہار ہیں ام کلثوم صبر کا مطلع انوار ہیں ام کلثوم نور توحید سے سرشار ہیں ام کلثوم شیر اللہ کی تلوار ہیں ام کلثوم آیت رب تھی سو جزدان سے نکلی ہی نہیں یہ وہ تلوار ہے جو میان سے نکلی ہی نہیں

دونوں بہنیں رخ توحید کی تنویریں ہیں کربلا والوں کے سب خوابوں کی تعبیریں ہیں ان کے باعث ہی تو اسلام کی توقیریں ہیں ایک قرآن شہادت کی یہ تفسیریں ہیں عکس توحید کی عکاس نظر آتی ہے اک علی دوسری عباس نظر آتی ہے

دونوں بہنوں کا سخن ایک ہے گفتار ہے ایک ان کی رگ رگ میں رواں خون کی رفتار ہے ایک ایک ہی عزم شجاعت بھی ہے کردار ہے ایک ہستیاں دو ہیں مگر دونوں کا اظہار ہے ایک ہر طرف شام میں جو موت کے یہ سائے ہیں دو علی شام الٹنے کے لئے آئے ہیں

کوئی سمجھا ہی نہیں نور علی ان کا مقام ذہن انساں پہ نہیں کھل سکا ان کا الہام بس اسی بات پہ کر نور علی بات تمام اک بہن فاتح کوفہ ہے تو اک فاتح شام دیں جو زندہ ہے تو اس دیں کی جلا ہیں دونوں یعنی حیدر کی نمازوں کا صلہ ہیں دونوں