Dowain Ronde Putar Ruqayya De
Noha Lyrics & Urdu Writeup on Farzandane Muslim
کوفے وچ پیو نوں لبھدے رہئے دوویں روندے پتر رقیہ دے
بے گانے دیس تڑپدے رہئے دوویں روندے پتر رقیہ دے
رہئے سوچدے دوویں شہزادے کوفے دی فضا کیوں بدل گئی
کوئی پیو دے نال ملاندا نئیں لوکاں دی وفا کیوں بدل گئی
ہائے پیو دیاں خیراں منگدے رہئے دوویں روندے پتر رقیہ دے
کسے ویکھیا اے اک قاصد نوں پردیسیاں دا او خزینہ اے
تطہیر مزاج مسافر اے تے اوہدا وطن مدینہ اے
ہر اک راہ گیر توں پچھدے رہئے دوویں روندے پتر رقیہ دے
نہ پیو دا سینہ دور ہوندا نہ ماں دی گود توں دور ہوندے
کوفے دی قید چہ خاک اتے چن زہرا دے نہ انج سوندے
بے جرم اسیر سسکدے رہئے دوویں روندے پتر رقیہ دے
پردیسیاں نال سلوک برا اس شہر دے لوکی نے کردے
راتاں نوں چھپ کے ظالماں توں گلیاں وچ پیو نے رہئے لبھدے
پیو مل جائے منتاں مندے رہئے دوویں روندے پتر رقیہ دے
تلوار وکھا مظلوماں نوں ہس ہس کے قاتل تڑپایا
دوواں نوں حارث قتل کرنڑ دریا دے کنارے جد آیا
رو وینڑ حسین دے پاندے رہئے دوویں روندے پتر رقیہ دے
آکھنڑ کی دسینئے پاک نبی ہوؤں ظالم لوک نے کوفے دے
منہ کر کے مدینے ول اپنی بے کس پردیسی غربت تے
چھوٹے چھوٹے ہتھ ملدے رہئے دوویں روندے پتر رقیہ دے
ساڈی امڑی راہ تکدی ہوسی پیو تے پتراں دی عید دے دن
حارث توں جاڑ ناں ایں کوئی ماں نئیں جی سکدی پتراں دے بن
ظالم نوں واسطے دیندے رہئے دوویں روندے پتر رقیہ دے
مینوں مار دے چھوڑ دے ویر میرا قاتل نوں واسطے پاندے رہئے
گردن تے گردن رکھ رکھ کے اک دوسرے نوں او بچاندے رہئے
اک دوجے دا گل چمدے رہئے دوویں روندے پتر رقیہ دے
کردے رہئے منتاں اسد مگر کسے پیو دے نال نہ ملوایا
بے دردیوں قتل کیتے حارث ملعون نوں ترس وی نہ آیا
اسی آل نبی آں کیندے رہئے دوویں روندے پتر رقیہ دے
Want these lyrics offline?
Install the Bayaaz mobile app for iOS and Android to read all 7,000+ lyrics offline, create personalized playlists, and experience seamless audio playback anywhere.