Yateemi Wich Rulhi Hoi Haan

یتیمی وچ رلھی ہوئی ہاں امن دی کائی جا بابا سمنڑ آئیاں سما بابا میکوں تاں نندر نئی آندی تیڈے سینے سوا بابا سمنڑ آئیاں سما بابا

جنازہ کھنڈیا ہویا مکمل کیویں تھیندا ہے ڈسا بابا معصومہ کوں کیویں لاشہ چنڑیندا ہے میں جوڑاں ہا جنازے کوں مگر آندا نئی ڈا بابا سمنڑ آئیاں سما بابا

تقسیم تھیئے ہوئے لاشے دی میں کیا ترتیب بنڑانواں ہائے نئیں مندری والی انگل ملی اجاں کتنے پتھر ہٹانواں دل آہندے لٹی ہوئی لاش کیتے تیکوں محشر تائیں پرچانواں تیڈی لاش لٹیندی ڈیکھ خیام اچ رہیاں روندیاں پھوپھیاں مانواں

اے پتراں والے کم ہوندن میں دھی وس لا نمی سگدی میں کل ہاں چار سالاں دی جنازہ چا نمی سگدی میکوں تاں لوڑھ سینے دی توں تیراں کوں ہٹا بابا سمنڑ آئیاں سما بابا

اتھاں لٹ دے آوازے اج میں سنڑ سنڑ کے تھکی ہوئی ہاں ظہر کوں جنگ ختم تھی ہے اوں ویلے دی ٹری ہوئی ہاں ملیوں ادھ رات دے ویلے میکوں جلدی لکا بابا سمنڑ آئیاں سما بابا

لتھی شام غریباں تاں میں مانواں توں نکھڑ گئیاں سمنڑ دی آس ہے بابا تیڈی مقتل دے وچ آئیاں تیکوں تہوں آنڑ گولیا ہم سما نئی سگدی ما بابا سمنڑ آئیاں سما بابا

آئی چوں سالاں دی معصومہ جڈاں پیو دی لاش دے کول اے ہائے تیراں پتھراں دے ڈھیر وچوں بیٹھی لاش بابئے دی گولے تیڈے باجھ نئیں آندی نندر میکوں رو آہدی اے ھولے ھولے اٹھی ڈیکھ تاں سہی ہن ویڑھ گئے خیام کوں بھاہ دے شعلے

لکھاں جھڑکاں وچوں بابا میں تیڈے کول آئی کھڑیاں میں سنڑائیے شام ونجڑاں ہے میں وی تیار تھی کھڑیاں ملنڑ تیکوں ہے بہوں اوکھا میں نہ آساں ولا بابا سمنڑ آئیاں سما بابا

تیڈے بے انت قاتل ہن جیڑھا خنجر چلیندا رہے تیڈا سر چا ٹریا ہئی جو میڈے در وی چھکیندا رہے بوؤں میکوں رووایا اوں تیڈا قاتل جو ہا بابا سمنڑ آئیاں سما بابا

اے گوہر وینڑ دھی دے ہن ایہو لحظہ الانویں ہا یتیمی وچ کیویں سمنڑے میکوں سمنڑاں سکھانویں ہا میں آخر چھوڑ ونجڑی ہے تیڈی اے کربلا بابا سمنڑ آئیاں سما بابا