Niklay jo khema gah se Zainab ke meh laqa

نکلے جو خیمہ گاہ سے زینب کے مہ لقا آئے قدم بڑھائے با انداز لافتی دیکھا جو بھانجوں میں قیامت کا ولولہ میداں کی سمت دیکھ کے عباس نے کہا اب دیر مت کرو کے چڑھائی کی دیر ہے فصلیں کھڑی ہوئی ہیں کٹائی کی دیر ہے

تلوار یوں چلاؤ کے لشکر دہائی دے داد وغا نجف سے علی کی کلائی دے جھنکار تیغ حق کی فلک تک سنائی دے بھاگیں جدھر یہ موت کا پہرہ دکھائی دے بزدل کہیں کے غازی و جرار آگئے کیا ہر طرف سے حیدر کرار آگئے

میداں ادھر ہو صاف جدھر لڑ رہے ہو تم ہو جائے دشمنوں کو خبر لڑ رہے ہو تم اس بھیڑ میں ادھر کے ادھر لڑ رہے ہو تم یہ طے نہ ہو سکے کے کدھر لڑ رہے ہو تم وہ ضربتوں میں زور ہو جبریل کانپ جائے رفتار دیکھ کر ملک الموت ہانپ جائے

قہر اللہ بن کے کرو دشمنوں پہ وار وہ وار جس سے ایک ہوں دو اور دو سے چار سر ان کے یوں اڑاؤ کے جیسے اڑے غبار لڑنے پہ آئیں شیر تو کیا ایک کیا ہزار میری طرح چڑھا کے ذرا آستین کو لشکر سمیت آج الٹ دو زمین کو

شامی محل میں آنے کے بیٹھے جو بے محل دانے سمجھ کے چگنے لگا طائر اجل کیسے لکھے بلال و وجیہہ شہہ ازل کرسی نشین خاک پہ گرتے تھے منہ کے بل لفظوں کے گرز ظلم کے سر پھوڑنے لگے لگتا ہے پھر بتوں کو علی توڑنے لگے