Sab kuch ayaan hai aap pe roodad Ya Ali

سب کچھ عیاں ہے آپ پہ روداد یاعلی ہم کو نہیں ہے کوئی سبق یاد یاعلی پیش نظر ہے ساعت امداد یاعلی گونگی زباں ہے مائل فریاد یاعلی ہم ان کی بارگاہ میں مدحت کو جاتے ہیں عباس بھی ادب سے جہاں سر جھکاتے ہیں

حاجت روائے ہر دو سرا یاعلی مدد عقدہ ہے پیش عقدہ کشاء یاعلی مدد عین خدا لسان خدا یاعلی مدد ہونا ہے مجھ کو مدح سرا یاعلی مدد زینب کا تذکرہ ہے زباں تھرتھراتی ہے تفسیر آیتوں کی کہاں مجھ کو آتی ہے

زینب شریک بزم شہادت کا نام ہے زینب نماز صبر کی نیت کا نام ہے زینب خود اپنے باپ کی زینت کا نام ہے زینب امامتوں کی ضرورت کا نام ہے سجاد بچ گئے یہ اسی کا کمال تھا ورنہ نبی کی نسل کا بچنا محال تھا

ناد علی پڑھوں تو قلم کو رواں کروں کوثر پہ حاضری ہو تو طاہر زباں کروں الہام ہو تو سر خفی کو عیاں کروں گرہ زباں کھلے تو فضیلت بیاں کروں جو خادم حسین وہ خادم ہے آپ کا سدرۃ کا جبرائیل ملازم ہے آپ کا

ماں نے پلا کے شیر کیا ہے تمہیں دلیر تم بھوک میں توانا ہو تشنہ لبی میں سیر گر تیغ کھینچ لو تو زبردست بھی ہو زیر ہاں طفل بھی تو ہوتے ہیں شیروں کے گھر کے شیر تم مظہر صفات خدا کے ولی بھی ہو دشمن کو یہ بتا دو نواسے نبی کے ہو

تھی آرزو کے دیدہ شبیر نم نہ ہو تنہا میان دشت امام امم نہ ہو دل نرم ہے حسین کا بار الم نہ ہو بھائی کو میرے فوج کی قلت کا غم نہ ہو غازی دلیر ناصر و جرار کر دیا دو کمسنوں کو حیدر کرار کر دیا