Lash Akber Ki Jw Maqtal Se Utha Laye Hussain

لاش اکبر کی جو مقتل سے اٹھا لائے حسین چاند کو شام کے بادل سے اٹھا لائے حسین

دیکھ لے آخری دیدار پسر مرتا ہے سامنے آنکھوں کے یہ نورِ نظر مرتا ہے دم ہے سینے میں رکا زخموں سے خوں جاری ہے ہائے بانو تیرا گھر لٹنے کی تیاری ہے چاند کو شام کے بادل سے اٹھا لائے حسین

ہاتھ پھیلا کے یہ چلائی کہ ہائے ہائے میرے لال راس آیا نہ میرے بچے کو اٹھارواں سال ٹکڑے تیغوں سے بدن ہو گیا سارا ہائے ہائے کون تھا جس نے میرے شیر کو مارا ہائے ہائے چاند کو شام کے بادل سے اٹھا لائے حسین

زخمی ہونے کی خبر کس نے میری پہنچائی جھوٹ ہے میں نے تو ہرگز نہیں برچھی کھائی مرگ سے پہلے ہو ماتم یہ زبوں ہے اماں میرے کپڑوں پہ تو عباس کا ہے خوں اماں چاند کو شام کے بادل سے اٹھا لائے حسین

بولی بانو کہ جو کہتے ہو خدا یونہی کرے اے میرے لال یہ ماں تیری بلا لے کے مرے مجھ کو معلوم ہوا خلق سے، جاتے ہو تم ہائے میرے رونے کے سبب زخم چھپاتے ہو تم چاند کو شام کے بادل سے اٹھا لائے حسین

سب تیرے دل کی میرے دل کو خبر ہے بیٹا ہاتھ سینے پہ تیرا خون میں تر ہے بیٹا سنسناتا ہے بدن جان چلی جاتی ہے ہائے اس لہو سے تو میرے دودھ کی بو آتی ہے چاند کو شام کے بادل سے اٹھا لائے حسین

اے میرے شیر تجھے لطفِ جوانی نہ ملا دودھ پی پی کے پلے اور تمہیں پانی نہ ملا مر گئے مجھ کو دلہن بھی نہ دکھائی بیٹا خاک میں مل گئی بانو کی کمائی بیٹا چاند کو شام کے بادل سے اٹھا لائے حسین لاش اکبر کی جو مقتل سے اٹھا لائے حسین