Tamachon ki saza

رُکی نہ ایک لمحہ بھی طمانچوں کی سزا باباؑ مَیں غش کھا کر گری لیکن ستم جاری رہا باباؑ مجھے یوں کربلا سے شام تک لے کر گئے ظالم تجھے مقتل میں جیسے کھینچ کر لایا گیا باباؑ وہ دُر اب مل بھی جائیں تو سکینہؑ کیسے پہنے گی کہاں باقی ہے اب وہ دُر پہننے کی جگہ باباؑ مِلا تھا ٹھوکروں سے جیسے پُرسہ دادی زہراؑ کو تیری بیٹی سکینہؑ کو بھی یوں پُرسہ ملا باباؑ ہزاروں مارنے والے تھے اِک تیری سکینہؑ کو تری بیٹی سکینہؑ کا تھا آخر جُرم کیا باباؑ ضعیفی آگئی دیکھو سفیدی بن کے بالوں کی اِسی دن کے لیے تم نے مجھے مانگا تھا کیا باباؑ لعینوں نے مری جینے کی خواہش قتل کر دی ہے کہو آمین کرتی ہوں مَیں مرنے کی دُعا باباؑ مجھے باباؑ تمہارے قاتلوں نے ہے بہت مارا مجھے ان سے چُھڑانے والا ہی کوئی نہ تھا باباؑ کہا محسنؔ، سکینہؑ نے جہاں بے شیر سویا ہے سُلا لو پھر مجھے اِک بار اصغرؑ کی جگہ باباؑ