Pidar ki maut hai

پدر کی موت ہے مرنا جوان بیٹے کا سفر جہان سے کرنا جوان بیٹے کا غضب ہے خون میں بھرنا جوان بیٹے کا ستم ہے جی سے گزرنا جوان بیٹے کا شباب تھا کہ شہ مشرقین سے چھوٹے محبوں پیٹو کہ اکبر حسین سے چھوٹے

خدا پدر کو نہ دکھلاے مرگ راحت جاں کلیجہ زخمی ہو جب دل کو پھر قرار کہاں ادھر تو سینۂ اکبر سے گزری نوکِ سناں لہو ادھر چشم امام دیں سے رواں تڑپ کے جانب گردوں نگاہ کی شہ نے زمین ہل گیء اک ایسی آہ کی شہ نے

پکارتے ہوئے دوڑے میرے شہید پسر میرے جواں میرے مہرو میرے سعید پسر میرے حسیں میرے یوسف میرے رشید پسر قریب ہو کہیں میداں سے یا بعید پسر پدر پہ آج نیء واردات ہے بیٹا خبر نہیں مجھے دن ہے کہ رات ہے بیٹا

کدھر گئے میرے گل پیرہن علی اکبر میرے قلیق میرے کم سخن علی اکبر جوانا مرگ غریب الوطن علی اکبر اجاڑ کر گےء میرا چمن علی اکبر بلا کے گھر سے یہاں اشقیاء نے لوٹ لیا دہائی ہے کہ مجھے کربلا نے لوٹ لیا

پکارتے تھے کہ اے شیر پھر پکار مجھے نہیں بتانے کہ لاشہ یہ نابکار مجھے تیرے فراق میں ہے زیست نہ گوار مجھے صدا سنا دے میں صدقے پھر ایک بار مجھے گلے لگا لو کہ سینہ ہمارا جلتا ہے کلیجہ منہ سے کوئی دم میں اب نکلتا ہے

پکاری ڈیوڑھی سے بانو پسر ملا کہ نہیں بتاؤ مرحم زخم جگر ملا کہ نہیں ستم کے ابر میں میرا قمر ملا کہ نہیں علی کے لال وہ عالی گُہر ملا کہ نہیں شتاب لاؤ میرے منتوں کے پالے کو تمہیں سے لونگی میں اپنے مرادوں والے کو

یہ ذکر تھا کہ صدا آئی دور سے ناگاہ جنابِ قبلہ و کعبہ اب آیےء للہ حضور حال سے بیٹے کے کیا نہیں آگاہ زبان آینٹھ گیء ہے غلام کی یا شاہ اکھڑ رہا ہے دم اب موت جان لیتی ہے پکارنے کی بھی طاقت جواب دیتی ہے

صدا یہ سنتے ہی سلطان بحروبر دوڑے یہ درد دل تھا کہ تھامے ہوئے جگر دوڑے کبھی تو فوج پہ مانند شیر نر دوڑے کبھی ادھر گےء روتے کبھی ادھر دوڑے لٹی ہوئی وہ کمایء بصد تلاش ملی زمیں پہ خون میں غلطاں پسر کی لاش ملی

عجیب حالت فرزند نو جواں دیکھی عطش سے ہونٹوں پہ نکلی ہوئی زباں دیکھی قمر سے چہرے زردی لبوں پہ جاں دیکھی کلیجہ پھٹ گیا سینے میں جب سناں دیکھی پدر کے سامنے بیٹے کا دم اکھڑتا تھا حسین دیکھتے تھے اور گھر اجڑتا تھا

قریب لاشے پسر بیٹھ کے یہ فرماےء زمین گرم سے بیٹا اٹھو کہ ہم آے صدا یہ سنتے ہی اکبر نے ہاتھ پھیلائے لپٹ کے لاش سے شہ لب پہ یہ سخن آے گلے لگا لو کہ محمد کا میں نواسہ ہوں زباں دکھا کے کہا یا حسین پیاسا ہوں

یہ کہکے شاہ سے کھینچی غریب نے اک آہ جگر میں ہونے لگا درد آہ کہ ہمراہ عجیب یاس کی نظروں سے دیکھ کر رخ شاہ کہا کہ اشہدو اللہ الہ الااللہ بس اور کہنا سکے کچھ یہ حال غیر ہوا سوےء بہشت گےء خاتمہ بخیر ہوا