Mehshar ki subah aaj

محشر کی صبح آج نمایاں ہے شام میں کنبہ شفیےء حشر کا ہے اژدھام میں سر ننگے روح فاطمہ ہے احتمام میں خاصان ذوالجلال ہے بلواے عام میں جبریل کی خزادیاں تشریف لائیں ہیں مشکل کشا کی بیٹیاں بندی میں آی ہیں

ہیں بیچ میں کھلے ہوئے آل عبا کے سر نیزوں پہ انکے گرد ہیں فوج خدا کے سر بچوں کے سر بزرگوں کے سر اقربا کے سر روتے ہیں وارثوں کے سروں کو دکھا کے سر سر رکھ کے زانووءں پہ جو وارث کو روتے ہیں ظالم سروں میں نیزوں کی نوکیں چبھوتے ہیں

نیزے پہ حرملہ کےچمکتا ہے اک ہلال بکھرے ہوئے ہیں چاند سے منہ پر جھنڈولے بال اولاد والے کہتے ہیں اے رب ذوالجلال اس بے زباں کے خون کا کس نے کیا وبال گردش میں ہاے ہاے یہ کس کا ستارہ ہے لیکر بلایں کہتی تھی بانو ہمارا ہے

ناگاہ ہوا یزید کا دروازہ آشکار حاضر نقیبو حاجبو دربانو چوبدار تیغ الم کیے ہوئے جلاد و نابکار مجرای بے حساب تماشائی بے شمار ایوان میں بھی رقص کا ساماں تمام تھا پر انتظار عترت خیرالانام تھا

بولے سب ایک بار وہ آے گنہگار اے قصور وار وہ آے گنہگار جلاد و ہوشیار وہ آے گنہگار وہ آے بے دیار وہ آے گنہگار جب سے کہ آسمان خدا نے بناے ہیں آل رسول آج ہی بندی میں آے ہیں

روکا عمر نے بڑھکے علم کو سپاہ کو مجراح پر آ جما کے کیا بارگاہ کو اور ہنسکے دیکھا آل رسالت پناہ کو آواز دی نبیرہء شیر الہ کو ہاں ہاں مہار روکنا اونٹوں کا تھامنا اب ہے یزید کے در دولت کا سامنا

پہنچے مراد کو سفر اپنا تمام ہے اترو اسیروں اترو ادب کا مقام ہے آگے تو آستانہء سلطان شام ہے دیکھو تو کیا جلال ہے کیا احتشام ہے اسکی ولا میں عرش کو ہم‌ نے ہلا دیا گھر پنجتن کا خاک میں بالکل ملا دیا

سننا یہ تھا کہ سب کے جگر پر چھری چلی اونٹوں سے اتری بیبیاں کہہ کہہ کے یاعلی آنکھیں پھراکے رہگیء بانو کی لاڈلی روح حسین کو ہوی جنت میں بے کلی طاقت بدن کی گھٹ گئی اور ضعف بڑھ گیا اترے جو بے سہارے تو دم ساکا چڑھ گیا

سینے میں دم ابھی نہ سماے تھے ہے غضب جو آے ریسماں لیے ہاتھوں میں بے ادب گھبرا کے پوچھا بیواؤں نے تجویز کیا ہے اب بولا عمر کے مجلس حاکم میں ہے طلب منظور ہے کہ روح علی پھر ملول ہو مجمع میں روح بکھراے آل رسول ہو

مظلومیت سے روکے یہ مظلوموں نے کہا حاکم کی یہ خوشی ہے تو پھر عزر ہم کو کیا بازار میں تو پھر چکے بے مقنہ و ردا آساں کرے گا مشکلیں دربار بھی خدا حاضر ہیں لے چلو ہمیں گمراہوں لے چلو سر پر نہیں حسین جہاں چاہے لے چلو

نیزوں پہ تھے نصب جو شہیدوں کے سر تمام زینب نے بڑھکے بھائی کے سر کو کیا سلام چلای کیوں ذبیحہ خدا شاہ تشنہ کام مرضی ہے کیا حضور کی کہتے ہیں کیا امام دربار مٹ گیا تیرا خوں رن میں بہہ گیا میرے لئے یزید کا دربار رہ گیا

پر اتنا ٹہرو وارثوں کے سر سے پوچھ لیں شاہ امم کے فرق مطہر سے پوچھ لیں دربار جانے کو علی اکبر سے پوچھ لیں عباس ابن حیدر صفدر سے پوچھ لیں مردہ نہ سمجھو زندہ یہ حیدر کے پیارے ہیں مختار ہم نہیں ہیں یہ مالک ہمارے ہیں