Tum bin raaton se

طشت میں شاہ کا سر قید میں جب لایا گیا روکے چلائی سکینہ در زنداں کھلا نبض سے ہاتھ ہٹاؤ ذرا اماں دیکھو میں نہ کہتی تھی کہ آئے ہیں پدر لینے کو گود میں باپ کا سر لے کے سکینہ بولی بابا اک بار بھی تم نے نہ خبر لی میری

تم بن کئی راتوں سے میں سوئی نہیں بابا کیا یاد سکینہ تمھیں آئی نہیں بابا

یاد آتا ہے وہ آپ کا سینے پہ سلانا منہ چومنا اور گود میں شفقت سے بٹھانا ننھے سے مرے ہاتھوں کو آنکھوں سے لگانا اب پوچھنے والا مرا کوئی نہیں بابا تم بن کئی راتوں سے۔۔۔

فرمایا تھا یہ آپ نے مٹی پہ سلا کر سو جانا جہاں تجھ کو سلائے تری مادر یہ دیکھیے بیٹھی ہوں میں زنداں کی زمیں پر میں آج بھی اس بات کو بھولی نہیں بابا تم بن کئ راتوں سے۔۔۔

دیتا تھا سزا شمر یوں بالوں سے پکڑ کر دوڑائے چلا جاتا تھا رہوار ستمگر مجبور تھی دوڑوں یوں ہی گھوڑوں کے برابر حالت وہ مری آپ نے دیکھی نہیں بابا تم بن کئی راتوں سے۔۔۔

میں کیسے کہوں کیسی تھی اس وقت غریبی ملنے کو ہمیں آئی تھی جب ہند کی بیٹی پہنے ہوئے کانوں میں وہ میرے ہی گہر تھی رملہ سے مگر کچھ بھی میں بولی نہیں بابا تم بن کئی راتوں سے۔۔۔

اک موڑ پہ ظالم نے ستایا مجھے ایسے لے آیا مجھے وہ سرِ عباس ع کے آگے اور سامنے ان کے مجھے مارے تھے طمانچے سب سہ گئی چپ چاپ میں روئی نہیں بابا تم بن کئی راتوں سے۔۔۔

پوتی ہوں میں زہرا کی فقط اتنا کہا تھا وہ سنگ گرے مجھ پہ لہو بہنے لگا تھا چہرہ مرا ماں سے بھی نہ پہچانا گیا تھا اب نام بھی میں اپنا بتاتی نہیں بابا تم بن کئی راتوں سے۔۔۔

اکبر کہا بی بی نے کمر خم ہوئی میری دادی کی طرح چھائی ہے بالوں پہ سفیدی فضہ کی طرح چہرے پہ چھائی ہے ضعیفی اب جینے کی خواہش بھی تو باقی نہیں بابا تم بن کئ راتوں سے۔۔۔