Wah hamshakle nabi

واہ ہم شکل نبی

اکبر جمال قدرت پروردگار ہے اکبر خدائی حسن کا آئینہ دار ہے لیلی کا مان ابن علی کا وقار ہے خالق کو جس پہ ناز یہ وہ شاہکار ہے جس کا نہیں جواب یہ وہ لاجواب ہے یہ ہو بہو شبیہ رسالت ماب ہے

واہ ہم شکل نبی

ہو اس کے روبرو بھلا کیا داغدار چاند منہ ابر میں چھپا کے چلے بار بار چاند ویسے محاورے میں تو ہوتے ہیں چار چاند اکبر نے کربلا کو لگائے ہزار چاند پایا ہے چہرہ مثل پیمبر اسی لیے رکھا گیا ہے نام بھی اکبر اسی لیے

واہ ہم شکل نبی

نہ صبح ہے نہ رات برابر کا وقت ہے ابن علی کے مہر منور کا وقت ہے تفسیر سورہ رخ انور کا وقت ہے یہ ذکر حضرت علی اکبر کا وقت ہے توقیر بڑھ رہی ہے در بوتراب کی آمد ہے پھر جہاں میں رسالت ماب کی

واہ ہم شکل نبی

شبیر کو وراثت خیر الوری ملی عباس کو شجاعت شیر خدا ملی قاسم کو عظمت حسن مجتبی ملی اس گھر میں شان سب کو خدا سے جدا ملی زینب نے پایا رتبہ اعلی بتول کا اکبر کو مل گیا ہے سراپا رسول کا

واہ ہم شکل نبی

گیسو بھی نور چہرہ طاہر بھی نور ہے پیکر بھی نور سینہ عامر بھی نور ہے باطن بھی اس کا نور ہے ظاہر بھی نور ہے حد یہ کہ اس قصیدے کا شاعر بھی نور ہے بیٹا ملا ہے ایسا نرالا حسین کو حیرت سے دیکھتا ہے اجالا حسین کو

واہ ہم شکل نبی

اب تذکرہ ہے اکبر خوش رو کی جنگ کا خاروں سے دشت زار میں خوشبو کی جنگ کا بازوئے کردگار کے بازو کی جنگ کا سر چڑھ کے بولتے ہوئے جادو کی جنگ کا نظریں اٹھا کے دیکھا تو ہر صف الٹ گئی خود موت اس کے پیروں سے آ کے لپٹ گئی

واہ ہم شکل نبی

اکبر نے تیغ کھینچی اڑے بے پروں کے سر کی جب نگاہ کٹ گئے دیدہ وروں کے سر زد پر اجل کی آئے جو فتنہ گروں کے سر شانوں سے خود ہی گرنے لگے خود سروں کے سر تھا شور بھاگو جنگ سے ہاتھوں کو جھاڑ کے لو آ گئے علی در خیبر اکھاڑ کے

واہ ہم شکل نبی

منظر یہ کارزار کا کیسے کروں بیاں اکبر کی تیغ آج اجل کی ہے ترجمہ تلوار کی چمک میں تڑپتی ہیں بجلیاں خیمے کے در پہ شاہ زمانہ ہے شادماں الٹی سپاہ نور علی اس کے وار نے اٹھ اٹھ کے داد دی ہے اسے ذوالفقار نے

واہ ہم شکل نبی