Suno Siffeen suno

سنو صفین سنو عباسؑ حیدرؑ سنو صفین سنو قرآنِ شجاعت سے میں یاسین سناؤں دل والوں صفیں باندھو میں صفین سناؤں سنو صفین سنو

کیا خیمہ حیدرؑ میں ہے صفین کا منظر جھرمٹ میں ستاروں کے ہے اک چاند زمیں پر حیدرؑ کے پسر چاروں طرف بیچ میں حیدرؑ یہ دیکھ کے حیران تھے خود مالکِ اشتر آئینہ نور ایک سبھی عکسِ جلی ہیں مولاؑ کہوں کس کو یہاں سارے ہی علیؑ ہیں سنو صفین سنو

بیٹوں سے مخاطب ہوا عمرانؑ کا بیٹا دل مجھ سے یہ کہتا ہے میرا اے بنی زہراؑ یعنی ہے یہ خالق کے ارادے کا ارادہ میداں میں لڑے آج کوئی بیٹا علیؑ کا کھل جائے کہ ولیوں کا ولی لڑتا ہے کیسے میں بھی تو ذرا دیکھوں علیؑ لڑتا ہے کیسے سنو صفین سنو

اک گوشے سے سن کر یہ اٹھا اک دلاور قد تیرا برس میں ابوطالبؑ کے برابر صورت میں علیؑ حمزہ صفت عزم میں جعفر سر تا بہ قدم قدرتِ معبود کا پیکر زہراؑ کی صدا آئی کہ الماس لڑے گا حسنینؑ کے بابا میرا عباسؑ لڑے گا سنو صفین سنو

گویا ہوا پھر دستِ ادب جوڑ کے ضیغم اے محرمِ اسرارِ خدا ہادیِ آدم حسرت ہے ہماری بھی لڑائی یہ لڑیں ہم وعدہ رہا یہ آپ سے اے قبلہ عالم زہراؑ کی تمناؤں کا عکاس نہ کہنا دشمن نہ علیؑ کہہ دے تو عباسؑ نہ کہنا سنو صفین سنو

سج بن گیا خیمے میں جو حیدرؑ کا دلارا صدقہ میرے غازیؑ کا وفاؤں نے اتارا چہرے پہ نقاب آپ یہ کرتا تھا اشارہ تاریخ نے دیکھا کہاں پھر ایسا نظارہ پردے میں کچھ اس طرح سے عباسِؑ جری تھے جیسے پسِ پردہ شبِ معراج علیؑ تھے سنو صفین سنو

خیمے سے برآمد ہوا حیدرؑ کا غضنفر غیظ و غضب و رعب جلال آئے غضب پر تیار نظر آیا جو لشکر پسِ لشکر جبریلؑ نے دم نادِ علیؑ کر لی پروں پر ہیبت تھی عجب سانس فرشتوں کے چڑھے تھے خود موت سے چھپ کر ملک الموت کھڑے تھے سنو صفین سنو

کس شیر کا میداں میں اترتا ہے جگر بند اعدا پہ کیا موت نے ہر زیست کا در بند منہ کھولے ہیں حیرت سے زبانیں ہیں مگر بند لشکر ہوا نظروں میں دلاور کی نظر بند توبہ کا نہ در رحمتِ عالم کا کھلا ہے سب بند ہیں بس راستہ جہنم کا کھلا ہے سنو صفین سنو

جس سمت چلا تیغ اٹھائے وہ بہادر سب طائرِ ارواح اڑے جسم سے پھر پھر دہشت سے تھا ہر ایک گروہ بھولے ہوئے گر تھا تیغ کی جھنکار میں پنچم کا عجب سر آواز یہی اہلِ دغا دیتے تھے بھاگو سب راگ پہاڑی میں صدا دیتے تھے بھاگو سنو صفین سنو

یک بار کیا شیر نے حملہ جو جھپٹ کر پتوں کی طرح جسم کی شاخوں سے گرے سر سن سن جو چلی تیغ الٹنے لگے لشکر پیغام علیؑ کا یہ ہوا نے دیا آکر ارے، دل کھول کے لڑ لو نہ تردد میں رہو تم عباس یہاں روک دوں سورج جو کہو تم سنو صفین سنو

تلوار سے ڈر ڈر کے نڈر بھاگ رہے تھے تھی موت ادھر رن میں جدھر بھاگ رہے تھے بھاگا نہیں جاتا تھا مگر بھاگ رہے تھے جلدی میں بدن چھوڑ کے سر بھاگ رہے تھے سانس ان کے رکے تھے کہ جو میداں میں رکے تھے زندوں کی یہ حالت تھی کہ مردوں میں چھپے تھے سنو صفین سنو

کہتی تھی اجل دشت سے بے جاں سمیٹو یہ ہاتھ یہ سر جسم یہ دنداں سمیٹو اے زخمیو بکھرے ہوئے ساماں سمیٹو گھر جاؤ میری مان لو ساماں سمیٹو مرتے ہو جوانی میں عجب ذوق ہے تم کو کیا خودکشی کرنے کا بہت شوق ہے تم کو سنو صفین سنو

تاریخ سناتی ہے یہ صفین کا قصہ میداں میں جو آئے پسرانِ بنِ شاشا ناگن کے سپولے تھے مگر واہ رے حملہ موسیٰ کے عصا کی طرح سب کھا گیا نیزہ ساتوں پہ بزرگوں کے سبق کر دیے روشن دو ایسے کیے چودہ طبق کر دیے روشن سنو صفین سنو

دل میں یہی کہتا رہا سرورؑ کا علمبردار پھر موقع ملے یا نہ ملے اے میری تلوار تیز اور ذرا تیز ہو اب تیز ہو رفتار اے کاش مجھے روکے نہ اب حیدرِ کرارؑ حق کر دوں ادا فاطمہ زہراؑ کے نمک کا ارے، بدلہ ابھی لے لوں گا میں ان سب سے فدک کا سنو صفین سنو

میداں سے اٹھا شور علیؑ ہے یہ علیؑ ہے کہتے تھے فدک خور علیؑ ہے یہ علیؑ ہے بولے یہ لبِ گور یہ علیؑ ہے یہ علیؑ ہے ارے، بالکل ہے وہی زور علیؑ ہے یہ علیؑ ہے سر اس کا اڑے گا جو کبھی اس سے لڑے گا اللہ کی طاقت سے بھلا کون لڑے گا سنو صفین سنو

شبیرؑ بھی کہنے لگے کیا خوب کیا کام دو ہاتھ میں ہی کر دیا کفار میں کہرام ان ہاتھوں سے ہونے ہیں ابھی اور بہت کام بھائی ہے تیرے واسطے بھائی کا یہ انعام تو آئے گا اے شیر پلٹ کر جو ہدف سے میں ہاتھ دباؤں گا تیرے ماں کی طرف سے سنو صفین سنو

حیدرؑ نے نقاب آکے اٹھائی جو تکلم عباسؑ کے ہونٹوں پہ نظر آیا تبسم باقی جو بچے تھے وہ ہوئے دیکھ کے گم سم مولاؑ نے کہا شام کے لشکر سے سنو تم یہ فاطمہ زہراؑ کی دعاؤں کا اثر ہے پہچان لو سب یہ بنی ہاشم کا بھی قمرؑ ہے سنو صفین سنو