Bada andhera hai

سکینہ قید ہو کر شام کے زندان میں جب آئی وہ بچی اس اندھیرے گھر کی تاریکی سے گھبرائی مقدر نے عجب آفت کی پہلی رات دکھلائی زمیں تو فرش تھا سایہ فگن تھا چرخِ نےمینائی پھپی کے ساتھ رہتی تھی نہ ماں کے پاس سوتی تھی برہنہ سر کھڑی زندان کے دروازے پہ روتی تھی

پکاری رو کے سکینہ بڑا اندھیرا ہے یہ کیسی قید ہے بابا بڑا اندھیرا ہے

میں ایک کونے میں بیٹھی ہوئی ہوں سہمی ہوئی دکھائی کچھ نہیں دیتا بڑا اندھیرا ہے پکاری رو کے سکینہ۔۔۔

جگر فگار ہے کمسن ہے اور اکیلی ہے نہ جی سکے گی سکینہ بڑا اندھیرا ہے پکاری رو کے سکینہ۔۔۔

تمہاری لاڈلی تنہا ہے کوئی پاس نہیں مدد کو آئیے بابا بڑا اندھیرا ہے پکاری رو کے سکینہ۔۔۔

اگر ہو آنا تو اصغر کو ساتھ مت لانا جہاں میں قید ہوں بابا بڑا اندھیرا ہے پکاری رو کے سکینہ۔۔۔

طمانچے لگتے ہیں میرے جو ڈر کے روتی ہوں مگر میں کیا کروں بابا بڑا اندھیرا ہے پکاری رو کے سکینہ۔۔۔

بہن سے ملنے کو آؤ اگر علی اکبر تو اِک چراغ بھی لانا بڑا اندھیرا ہے پکاری رو کے سکینہ۔۔۔

بہت تڑپتے تھے سجاد یہ صدا سن کر بہن بلاتی ہے بھیّا بڑا اندھیرا ہے پکاری رو کے سکینہ۔۔۔

کوئی چراغ جلانے نہ آسکا ہائے پکارتی رہی دکھیا بڑا اندھیرا ہے پکاری رو کے سکینہ۔۔۔

کہاں کے ہیں یہ مسافر شکستہ حال و غریب کہاں کیا ہے بسیرا بڑا اندھیرا ہے پکاری رو کے سکینہ۔۔۔

اب اُس کا مقبرہ مینارِ نُور ہے گوہر جو روز کرتی تھی نوحہ بڑا اندھیرا ہے پکاری رو کے سکینہ۔۔۔